665

<< Nr. 664 | Index | Nr. 666 >> 

Absender: Oecolampad, Johannes

Empfänger: Zwingli

Ort: Basel
Datierung: 6 XI (1527)

Vorlage: Huldreich Zwinglis sämtliche Werke, vol. 9 (Leipzig: Heinsius, 1925) (Corpus Reformatorum 96), 297-298

--297--

Salutem in Christo, dilecte frater.
Responsionem nostram senatui oblatam omnes boni consulimus,
quod excudatur, idque multis nominibus, maxime, quod quidam ad
alias scripsere civitates senatum nostrum expendisse utriusque scripta
et ea propter hanc sententiam tulisse, ut sacerdotes non missantes
proscribantur. Cęterum de titulo pręmittendo non multum anxii sumus,
quem vos isthic decernatis. Nemo ex fratribus est, qui subscribi
nomen suum detrectet. Vereor autem, ne tardius literę reddantur,
alioqui monerem, placere nobis hunc titulum: "Antwort der predikanten
zu Basel, so von einem ersamen radt aldo ersucht, warumb sie gepredigt
haben, das die bepstisch meß ein greuwel für gott und kein
opfer fur die lebendigen und die todten". Nomina vero symmistarum
sub calcem censent ponenda. Septem sumus: Ioannes Oecolampadius,
lutpriester by S. Martin, Marcus Bertzius, lutpriester
by S. Lenhard, Wolfgang Wissenberger, lutpriester im spital,
Ioannes Luithardt, predicant zun Parfusser, Thomas Gierfalk,
predicant zun Augustiner, Hieronymus Botan, diacon by S.
Martin, Balthazar Vogelin, diacon bey S. Lenhardt. Quodsi

--298--

liber excusus est, nihil nos movebit, etiamsi nostrorum nominum
nulla fiat mentio; sufficit enim nobis, si veritas abominationem illam
summam confundat. Hisce diebus nullus nuncius obvenit, ut de titulo
moneremus. Sed bene se habet, utcunque habet.
Iam testari debeo, quod multum consolationis literę tuę fratribus
attulerint, ex quibus perpetuo solicitum pro nobis et plane sincerum
animum tuum vident. Consilia tua eadem cum nostris fuerunt, et
illa quidem attentata omnia, et prętermissum ne unum quidem, maiore
etiam animo et circumspectione, quam de parvitate nostra requireres.
Et adhuc non cessamus obtestari, obsecrare dure et amice. Sed nondum
respicit nos dominus. Surdis canitur fabula, et nescit remedia
immedicabilis Basel. Cętera, quae hic acta sint his diebus, Andreas
vester, ubi redibit, narrabit. Capito scribit certa relatione accepisse,
multos gravissimos viros Lutherum dehortari a scribendo. Equidem
vellem illum, ut sua mala conscientia abstraheret.
Salutant te fratres omnes, in quibus nihil, quod ad constantiam
vel ad providum zelum, attinet, nunc desidero.
Salvi sint Pellicanus Leoque cum aliis collegis nostro omnium
nomine.
Vale.
Basileę sexta Novembris 1527.
Ioannes Oecolampadius.
Huldrico Zwinglio, charissimo fratri.