668

<< Nr. 667a | Index | Nr. 669 >> 

Absender: Oecolampad, Johannes

Empfänger: Zwingli

Ort: Basel
Datierung: 24 XI (1527)

Vorlage: Huldreich Zwinglis sämtliche Werke, vol. 9 (Leipzig: Heinsius, 1925) (Corpus Reformatorum 96), 311

--311--

Gratia et pax a Christo. Charissime Huldrice
Quid nobis in re Bernensi, quę nos haud mediocriter exhilaravit,
faciundum censeas, audire cupimus ex te. Aderimus, si permiserit
dominus, colloquio. Feliciora enim pollicemur, quam de Thermis.
Christus fortassis ita gloriam suam revelaturus est. Nequit enim
veritas absque omni fructu edoceri. Utinam ibi mutuis complexibus
novum annum auspicemur in gloriam Christi! Tua authoritate et
eruditione pręsens plurimum poteris, sive adsint sive absint adversarii.
Cęterum optime actum est, quod responsionem nostram isthic excudi
fecistis. Non est, quod Christophorus metuat, quando quidem
nihil additum ad ea, quę nos obtulimus. Sunt, qui vellent etiam
adiungi ea, quę responderunt adversarii. Harum fortassis copia haberi
possit, sed de ea re iussi Immelium, ut coram tibi loquatur tuumque
consilium nobis exquirat.
Vale.
Basileę 24. Novembris 1527.
Tuus Oecolampadius.
Huldrico Zwinglio, fratri charissimo.