67
Absender: Zwingli
Empfänger: Rhenanus, Beatus
Ort: Zürich
Datierung: 21 III 1519
Vorlage: Huldreich Zwinglis sämtliche Werke, vol. 7 (Leipzig: Heinsius, 1911) (Corpus Reformatorum 94), 152
--152--
Rhenano suo Zinglius S.
Vix, mi Rhenane, ad finem tuam legi epistolam, cum Sanderi
famulus appellat, si quid velim Basileam scribere, festinem, nam
adesse baiuli occasionem, sed in procinctu stantis. Ego animo, licet
avide tua Lutheriique legerem, illi echinum aut remoram precabar,
donec lectis omnibus, quid scripto usus esset, rescirem. Accepi
utramque epistolam gratissime simulque tristissime, quod rescirem, quę
prius non admodum ignorabam, at non ęque credebam, quod dolebat
hunc ἀνθρωπάρεσκον aut, si mavis, κόκκυγα in redeuntem theologiam
meditari, quod Francus in Germaniam. Verum dominus dabit
fortitudinem plebi suę, neque salvabit recte confitentem Judam in
quadrigis aut equis, sed in sua misericordia. Omnia adprobe tacebo
vel prodam. Christus faxit, ut vel aliqua valeam parte huius purpuratę
meretricis turpitudinem retegere, quo Israel videat lucem, qui
in mundum venit, Christum ab ea turpari, utque possim tuę in me
benignitati respondere.
Vale et consule omnia optimi; nam hęc tonante ieiunio ventre et
baiulo urgente ita scribimus, ut, an scripserimus nec ne, tuo submittatur
arbitrio.
Ex Tyguro ipso die Benedicti et. MCCCCCXVIIII.
Eruditissimo viro Beato Rhenano. Gen Basel zum Saessel.