676

<< Nr. 675 | Index | Nr. 677 >> 

Absender: Oecolampad, Johannes

Empfänger: Zwingli

Ort: Basel
Datierung: 18 XII (1527)

Vorlage: Huldreich Zwinglis sämtliche Werke, vol. 9 (Leipzig: Heinsius, 1925) (Corpus Reformatorum 96), 332-334

--332--

Gratiam et pacem a domino.
Quę ab Ursis ad te scribuntur, Ursi ipsi nunciarant; nam die
lunę, sibi indici, ut spectaculo pręsit, audiit. Nescio, an modestia
rusticitatis dilationem respondendi usque in hodiernum diem obtinuerit.
Quid responsurus sit, incertum. Dies indictus est papistis, ut
senatui tandem significent, hicne manere velint, an proficisci. Lupum
auribus tenent. Verentur, ne senatus iubeat, qui pridem . . . supplicabat.

--333--

Parcendum enim est tenellis, ne tangantur, praesertim tam
bene de republica deque re christiana meritis. Precamur Christum,
ut, quod ipso dignius et euangelii caussę utilius est, ponant et decerni
cognoscant. Porro suffraganeus, quum fęturam suam excudi intellexisset,
impatiens discurrit, magistratui conquestus est et petiit typographum
impediri. Non tamen ei omnino assensum, sed coram toto
senatu caussam suam dicere iussus, . . . obtinuit. Satis tempestive
ipsum tractabimus. De Argentinensibus hęc habe: Expectamus
eos, quorum desiderio maxime teneris. Nudiustertius enim iterum
literas eorum (?) accepi, quibus significant, se affore ante praestitutum
diem, ut ubere colloquio satiemur. Sunt enim quędam, quę inter nos
agi expedit. Quibus rescripsi, ut huc quidem properarent; sed nec
mihi nec tibi integrum esse ante diem Bernam videre, partim ne
adversariis suspitionis fomitem suppeditemus, partim quod absque
deductoribus abire etiam m (?) . . . conductu minus tutum est. Petierunt,
ut hoc tibi nunciarem. Ubi caussam mihi (?) hic proposuerint,
fortassis ad te simul volabimus et comites itineris tui erimus. Tu
rescribito, quid illis nunciari velis. Curabo, ut primo quoque nuncio
certiores reddantur. De mea valetudine nihil terreri oportebat.
Horror potius fuit, quam morbus, de quo scribebam. Deo laus sit,
sanior, locupletior, animosior, infractior sum, quam adversariis meis
gratum est. Nihil ex solitis laboribus intermisi. Si dominus me
organo uti voluerit, certus sum suffecturum vires. Nollem plane vel
incrementum vitę amplius dari. Tam multa sunt, quę vitam hanc

--334--

amaram faciunt. Invitavi et Brentium meum, quem si attraxero,
confido, dominum mentem eius immutaturum. Dominus nos custodiat
et omnia in gloriam sui nominis dirigat. Nihil suspiceris, quod per
ministrum scribo. Ita solemus delicatiores, et nunc valetudinis aliquantulam
curam habere incipio.
Bene vale.
Basileę 18. Decembris 1527.
Ioannes Oecolampadius τῇ ἐμον̃ (!) χειρὶ ὑπέγπαψα.
Huldrico Zwinglio, suo fratri. - Zürch.