688

<< Nr. 687 | Index | Nr. 689 >> 

Absender: Haller, Berchtold

Empfänger: Zwingli

Ort: Bern
Datierung: 12 II 1528

Vorlage: Huldreich Zwinglis sämtliche Werke, vol. 9 (Leipzig: Heinsius, 1925) (Corpus Reformatorum 96), 361-363

--361--

S.
Scribunt nostri Bernates, charissime Huldrice, pro Megandro,
Sebastiano Oeconomo et ludimagistro Curiensi, quem
cum primis Megander commendaverat, quod tum ad contiones, tum
et ad lectiones aptus satis esset. De Sebastiano sic scribunt
domini, quod si senatus vester eo carere nolit, alium subordinent, qui

--362--

et docendi linguas et praedicandi provinciam aptus sit suscipere. Tu
igitur pro tua in omnes ecclesias sollicitudine age, ut initiis nostris
bene consulatur. Vocavit me senatus noster, ut indicarem viros
doctos; hos itaque indicavi ea fiducia, quod nos deserturus non sis.
Age igitur, quem semper egisti, charissime Huldrice; nam non
minus, immo multo magis tua egemus opera, ut, quae deus per te etiam
aput nos cępit, eadem et perficiat [Phil. 1. 6]. Cęterum pro parochis
ditionis nostrę introductorio te proxime monueram, quantocius unquam
fieri poterit, congere et congestum mitte. Non deerunt nuncii, qui
ad vos rursum referant; modo aput vos ocyssime excudi possit. De
pensionibus instamus et urgemus maximopere et speramus propediem
eventurum, ut similes Tigurinis doctrina et moribus nostrates
evadant. Laborabis item, ut Megander cum Sebastiano vel alio
festinent ad nos audituri conditionem omnem. Obsecrant nostrates
senatum vestrum, quatenus hac re auxiliares copias non negent.
Instabis igitur et tu. Nam horum nihil tui sine te acturi sunt.
Interea vale, salvique sint omnes fratres.
Ligaturam pro hernia a Friczio nemo ad nos ferat, nisi
Megander. Aut Sebastianus. Sic vero parate omnia, ut concionatorem
habeamus unum in promptu cooperatorem; nam eo carere non
possumus.

--363--

Xenodochium nunc in consilio tractatur ad fratres praedicatores
transferendum. Cogimur item et nonnis Insulę contionari.
Rursum vale cum thori tui genialis socia charissima.
Bernę 12. Februarii anno 1528.
Tuus ex animo Berchtoldus Hallerus.
Huldricho Zuinglio aput Tigurinos ecclesiastę,
fratri suo charissimo.