69
Absender: Glarean
Empfänger: Zwingli
Ort: Paris
Datierung: 25 III 1519
Vorlage: Huldreich Zwinglis sämtliche Werke, vol. 7 (Leipzig: Heinsius, 1911) (Corpus Reformatorum 94), 155-156
--155--
Zinlio suo Glareanus S.
Pauca scribam, charissime Uldrice; scripseram enim pridem
epistolam bene longam, qui longo tempore a te nullas accepi literas.
Nam eas, quas militi isti, qui sub decembrem ad nos venit, dedisti,
sero recepimus. Et doluimus plane, quod homo iste et nos et vos
decepisset. Iuvenibus enim nostris literae venerunt, pecuniae non
venerunt; unde procul dubio convincimus nebulonem cum pecunia
abiisse. Sed miles erat! Quod probas meum in te candorem, cogita
modestiam illam tuam et humanitatem (nam doctrinam, more adulatorum,
quid attinet hic commemorare?) longe maiora meruisse. Laudo
te, digne laudo, et scis laudi isti abesse adulationem, quandoquidem
nihil ambimus apud te. Et erat, quod ambiremus, amor videlicet.
Sed illum sane scio in utroque parem. Probo nunc item, quod Tigurum
concesseris, futurum enim auguror, ut fides Christi augmentum
illic sit acceptura te duce haud mediocre. Quod dominus Felix
Fryg praeposituram nactus sit, puto in rem meam esse. Is est
primus, qui me ambire Tigurinorum amiciciam iussit. Vir est, ni
fallor, qui doctos amat, ipse etiam, ut ea aetas tulit, non vulgariter
doctus. Musicen mire amat, quae res primum me illi familiarem fecit.
Caeterum σὺ οὐκ ἀγνοεῖς, ὡς χρὴ τοιούτους ἄνδρας διαλαμβάνειν. Verum
--156--
haec tecum cogita, ὡς ἀφελῶς ἅπαντα γράφω. Quid autem mihi apud
te timendum, apud quem sunt omnia circumspectissima?
Vale et mutuum ama
Luteciae anno Christi M.D.XIX. ad octavum Calen. April.
Adest Ioannes Lascaris, Graecus, mire eruditus, ad quem
ego saepe commeo una cum Ammano meo Tigurino, iuvene clarissimo.
Laborat ille podagra, quare facilis est accessus. Vigiliis magnis
nunc rursus graecor, ut videlicet socius tibi non desit aut congerro,
si rursus in Helvetios concessero.
Vale, mi Ulderice
Domino Vldrico Zinlio, Doggio, viro integerrimo, latine graeceque
docto, philosopho et theologo, amico nostro eximio. Tiguri.