690

<< Nr. 689 | Index | Nr. 691 >> 

Absender: Fagius, Paulus

Empfänger: Zwingli

Ort: Isny
Datierung: 13 II 1528

Vorlage: Huldreich Zwinglis sämtliche Werke, vol. 9 (Leipzig: Heinsius, 1925) (Corpus Reformatorum 96), 366-368

--366--

Gratiam et pacem a domino.
Quod bonis avibus ad tuos redieris penates peracto conflictu
Bernensi, magnopere congratulor, quamvis intellexerim, quantas
procellas Sathan tibi remeaturo paraverit, attamen diis gratia,

--367--

qui te incolumem tuis restituerunt nec ullis te periculis succumbere
voluerunt. Mitto tibi hic literarum fasciculos, candide Udalrice,
quos tu vel in primis ęquo ac benevolo animo suscipere velis.
Improviso enim instinctu quorundam tuam humanitatem hac mea
barbarie potissimum onerare persuasus, quam tu boni consulere velis,
limamque tuam, sicubi operepraetium videbitur, adhibere ne dedigneris.
Ut autem scias, quales quales sint, qui me ad scribendum tibi iamiam
impulerunt, scias eosdem esse, qui praesentes has tibi offerunt chartulas.
Convenerunt enim me, posteaquam ancoram nostro iniecissent
oppidulo; exploratam enim sibi meam conditionem ex quibusdam
amicis sciscitatis prius reddiderant, indicantes sese vel primo congressu
(periculo a me facto, quae aëris tempestas ipsos in nostras
detulisset terras) exulari propter Christum. Hactenus enim (ut retulerunt)
sub ducatu principis Austrię victitarunt, quem plane horrenda
tyrannide in Christum Christique fideles sevire aiunt. Et, ut nosti,
quam pium mandatum ante complusculos dies ediderit, quo miris
modis homines a Christo nostro salvatore arcere nititur. Huic, inquam,
edicto isti, ut ferunt, antequam auscultare, citius vel omnibus bonis
destitui voluerunt, solum ut lucrarentur Christum [Phil. 3. 8], considerantes
scilicet, deo magis quam hominibus acquiescendum [Act. 5. 38]
patremque coelestem magis quam vel umbras hominum expavescendas.
Eoque boni fratres dulcibus relictis laribus ad tuos properant penates,
sperantes nonnihil solatii consiliique apud te reperturos. Quare,
charissime Udalrice, tuam humanitatem impendio efflagitamus, ut
eos ex me commendatissimos habere velis. Quantum enimvero mihi
divinari [!] licuit ex colloquiis ultro citroque agitatis, nihil vel tantillum
mali suspicari potui; ex omni immo parte beatos arbitror. At tu
interim, cui (quotidiano experimento) iuditium exercitatius eoque

--368--

certius, penitius introspiciendo latius rem trutinato; poteris enim (vel
primo intuitu) facile ex ipsis conditionem eorum expiscari. Videtur
mihi alter literarum non ignarus. At tibi se ipsos totos enodabunt.
Quare tu ipsis pro viribus, quicquid commodo utilitatique fuerit,
tanquam Christianus impertias, frater, ne forsitan ipsis admota
aratro manu retrospicere contingat [Luk. 9. 62].
Vale in domino.
Raptim ex Ysna 13. Februarii anno 1528.
Otium si tibi suppeditabit, ne mihi iterum respirare dedigneris,
rogo. Conradum Pellicanum ex me plurimum salutato. Conradus
Friccius, noster concionator, cui tu per me retroactis diebus
nonnihil literarum admisisti, multa te quoque impertit salute, eodemque
studio parique animo te summopere precatur, ut fratres istos sub
tutelam tuarum alarum quam offitiosissime excipias.
Vale iterum.
Paulus Fagius, ludimagister Ysnensis.
Eximio viro Magistro Udalrico Zuuinglio, episcopo apud Tygurinos
vigilantissimo, domino et fratri meo in Christo charissimo.