693

<< Nr. 692 | Index | Nr. 694 >> 

Absender: Zwingli

Empfänger: Sam, Konrad

Ort: Zürich
Datierung: 7 III 1528

Vorlage: Huldreich Zwinglis sämtliche Werke, vol. 9 (Leipzig: Heinsius, 1925) (Corpus Reformatorum 96), 373-374

--373--

Huldrichus Zuinglius Cunhardo Somio, Ulmensium
euangelistae, fratri suo charissimo.
Gratiam et pacem a domino.
Ego, charissime Cunharde, nihil habeo, quod te magnopere
scire referat, quam quod Oecolampadius et Argentinenses fratres
salvi domum redierunt. Berna ascivit ex fratribus nostris doctorem
Sebastianum, Casparem et Rellicanum. Cęteri Helvetii
eodem modo furiunt, quo prius. Claronę, is est octavus pagus
Helvetiorum, tres ecclesiae sustulerunt imagines; quotidie fit aliqua
accessio.

--374--

Althamer insignia spargit mendacia: nulli licuisse libere
loqui, se praeter voluntatem coactum disputare, provocatione
Francisci Kolbii, cum tu cum omnibus nobis scias, eis, imo ei
praecipue, copiam liberrimam esse factam, et quod volens ac libens
passus est se a parte sua eligi, ut oratoris munere in suggestu
fungeretur. Sed quid victis aliud quam dolor?
Acta disputationis diligenter et anxie excuduntur; nunc 34 paginę
absolutae sunt; supersunt adhuc viginti, aut forsan supra. Pręest
pręlo secretarius ex Duna, qui ex scribis unus est, etc.
Vale, et fratres omnes salvos iube; nec obliviscere eorum, quę
praesente Ambrosio commenti sumus. Semper enim dirigenda sunt
consilia in aliquem honestum et bonum finem eorum, quibus praesumus,
etiamsi nihil temere sit audendum.
Tiguri 7. die Martii 1528.