705

<< Nr. 704 | Index | Nr. 706 >> 

Absender: Capito, (Wolfgang)

Empfänger: Zwingli

Ort: Strassburg
Datierung: 29 III 1528

Vorlage: Huldreich Zwinglis sämtliche Werke, vol. 9 (Leipzig: Heinsius, 1925) (Corpus Reformatorum 96), 406-407

--406--

Gratiam et pacem.
En Hoseam nostrum, ex quo gustum capies iudicii nostri praecipua
loca discutiens. Quodsi minutię quędam inter nos variant, charitatis
summam non viciabunt, qui in exaltato Christo tantopere
concordamus. Tui memineram in Hosea. Probavit Bucerus, nisi
quod verebatur domesticum fore testimonium et suspectum atque invisum
malevolis, quod in tempore dictum pondus esset habiturum.
Itaque expunxi, ne pręcox studio causae incommodarem.
Lutherus et papistę in te choragum disputationis Bernensis incursionem
facient; tum erit tempestivum, ut aperte sub tuis signis
profitear, quod sum et animose et dextre fortassis facturus. Bucerus

--407--

nihil tui commeminit in Ioanne, quod utrumque pęnitet. Nam videtur
φιλονικότερον praefatus, quasi suum celebraret trophęum, quod victor
adversus Tregarium statuisset. Cui rei postera cura satis opportune
medebitur, et acta quoque declarabunt, quantum in te et Oecolampadio
situm sit et quantum aliorum. Nostra enim opera perpusillum
profuit. Neque est, quod stultitiae crimen apud te deprecemur, cui
de animo nostro constat, et quem vitia nostra celare non cupimus,
sed abs te malumus emendari. Sunt, qui inter nos dissidium anxie
prestolantur, quos sperato gaudio facile fraudabimus. Novimus integritatem,
fidem, curam, longanimitatem et vere in te episcopi dotes, et
vicissim tu nostram simplicitatem et patientiam, qui possimus etiam
adversariis cedere; unde certum suspicionis argumentum de nobis
neutiquam praebebimus, quin furiosum Saxonem placiditate nostra
degravabimus, qui nos dissentientes non solum mutuo ferimus, sed ex
animo in suo quemque cursu secundo applausu adiuvamus. Quę
tamen de fędere Suevico certa modo feruntur, incerta erant, quę
nuper ex literis ad senatum destinatis nos ad te scripsimus, quibus
vana multa includebantur.
Lutheri colophonem, "den garuß", brevi videbis. Placidissimum
istud pectus equanimitate sua diputationis Bernensis fraudes deteget;
sic enim promissum ab eo autumant amici. Tum erit occasio respondendi.
Quodsi non molestum est, oro, interim sępe scribas;
nam ad reipublicae decorum literę tuę conducunt etc. Leguntur enim
multis, quę uni nostrum scribis.
Bucerus te vehementer salutat, item et fratres reliqui.
Vale.
29. Martii Argentorati anno 1528.
Capito.
Huldericho Zuinglio, euangelistę Tigurino,
fratri et maiori suo observando.