707

<< Nr. 706 | Index | Nr. 708 >> 

Absender: Oecolampad, Johannes

Empfänger: Zwingli

Ort: Basel
Datierung: 1 IV (1528)

Vorlage: Huldreich Zwinglis sämtliche Werke, vol. 9 (Leipzig: Heinsius, 1925) (Corpus Reformatorum 96), 413-416

--413--

Gratia et pax a Christo.
Mitto hic charitati tuę, frater charissime, aliquot libellos, qui non
essent hic excusi, nisi nobis iratus esset deus. Hactenus qualitercunque
me consolatus sum, quum pro solis suggestibus partim pro
Christo, partim pro Antichristo, declamaremus. Sperabam enim
tenebras veritatis radio cessuras tandem, et adversariorum vanitatem
sua ipsorum temeritate manifestandam. Non hoc per arrogantiam
loquor. Vix est alia urbs, in qua maiore patientia et vigilantia verbum
dei diutius hoc seculo annunciatum est. Tyrus ac Zidon olim
in sacco et cinere poenitentiam agentes, nauseassent suas abominationes
[Matth. 11. 21f.], at nos non solum non hęremus, sed et retrocedere
videmur. Itaque nunc valde terreor, non ignorans, quantum periculi
immineat civitatibus falsos prophetas amantibus ac foventibus, veritatis
autem minorem habentibus curam. Excęcentur enim necesse est.
Coecae non evadant, quin cum cęcis ducibus in foveas cadant [Matth.
15, 14], a quibus, quum iratum deum habeant, qui solus liberare potest,
educi nequeunt. Sola Hierusalem admonere posset, ut prudentius
sibi consulerent, si exempla spectare vellent. Sollicitus igitur et
anxius sum, nomine plebis, cui adesse me dominus voluit. Est certe
bona, si non maior pars civitatis, quae toto corde dolet tantis nos
dissidiis laborare et quasi ludere pro animabus Christi sanguine

--414--

redemptis. Unde etiam zunfftae quaedam supplicarunt senatui. Nos
nihil omittimus. Porro deus nos tardius respicit, nimirum negligentius
orantes, siquidem aliquando respecturus et non penitus reiecturus.
Videre ex libellis istis potes, quanta licentia adversariorum, quam nulli
parcant. Eccianę epistolae hic excusae sunt, et facta est Basilea
Ingolstadium. Quis typographum impulerit, coniecturae sunt.
Senatus facile potuisset rescire. Suffuraneus, ut dilutas nugas, imo
blasphemias suas, quas refellimus, tueretur, amplius blasphemat calumniaturque
tam aperte, ut refellere non iuvet tam impudenter dicta.
Hęc novit tota civitas, et connivent, qui impedire possent. Interim
male audit euangelium ac nos, et ipsa Basilea, pessime, vereorque,
ne, dum semper utraque sella sedere velit, utraque excludatur aliquando.
Quid Christiani sentire de ea possunt, qui talia hic doceri
et evulgari legunt? Quantum favebunt adversarii, qui nos audiunt haec
publice damnare? Equidem civilium negociorum ignarus sum, ut ex
prophets nihil colligam; auguror tamen, quod vel eloqui exhorresco.
Vae domui in se divisae [Matth. 12. 25]
Ex eadem officina et Pelargus, monachus vere indoctus, suas
nugas extrudit, Gręca et Hebręa citat, quum vix elementa earum

--415--

linguarum teneat. Atrocianus, ludimagister apud s. Leonardum,
tam bellis carminibus pietatem iuvari cupit. An non libera civitas
est Basilęa, in qua et impiae blasphemię impunes? Quid libelli
autem mei olim passi sint, non ignoras. Ad hęc nos in pręsentiarum
nihil egimus, quam quod plebi publice innocentiam nostram declaravimus,
senatui quoque diximus, paratos nos et ad respondendum, sicubi
putemur contra mandatum ipsorum docuisse, et ad ostendendum, adversarios
nostros in multis contra mandatum ipsorum docere. An non
putes irato similem deum civitati, quę hę audit et non emendat?
Scribo hęc, frater, fideliter tibi, ut cures etiam isthic pro nobis preces
fieri, si forte deus nobis quoque id gratię concedat, ut unanimes doceamus
ac pure Christum, et excitet aliquos amicos huic civitati, qui
eam admoneant periculorum suorum, quandoquidem surdis auribus nos
pręterit. Tigurini fortassis et Bernates in hac re possent plurimum,
utpote maiore necessitudine nostratibus iuncti, maxime quum intelligant,
huius factionis maledicentia se et optimos quosque ac pientissimos
contemptum iri.
Coniugium meum boni spero fore auspicii, quandoquidem mundo
et nostris hypocritis euangelium ore crepantibus, qui et ipsi mundus

--416--

sunt, valde displicet. Video, quanta res sit et quam secura, vitam
bona conscientia agere. Pelargo respondi Latine. Wolphgangus
in hospitali vertet. Suffuraneo non respondebo, nisi iusseris.
Indignus est ob apertas calumnias, tametsi illis interim papistica secta
glorietur.
Bene vale, et deum pro nobis ora.
Nunc Basilea talia dona mittit. Si placet, exurito, vel inter
thesauros collocato.
Basileę, prima Aprilis 1528, 1. Aprilis[!].
Heinricus David Emeo typographo conductorem e domo sua
excedere iussit ante ferias paschales; sed nescio, an facturus sit,
quandoquidem nihil tale sperans ad anni spatium locarit.
Ioannes Oecolampadius tuus.
Huldrico Zwinglio, Tigurinę ecclesię fidelissimo doctori,
fratri suo.