76
Absender: Glarean
Empfänger: Zwingli
Ort: Paris
Datierung: 15 V 1519
Vorlage: Huldreich Zwinglis sämtliche Werke, vol. 7 (Leipzig: Heinsius, 1911) (Corpus Reformatorum 94), 168-170
--168--
Zinlio suo Glareanus S.
Vix unquam plura habebam, quae scriberem, charissime Zinli,
cum tamen brevem hic videas chartulam, si numeres lineas, longam
tamen, si perturbationes hic nostras ex Iacobo nostro Ammano
noscas. Primus eram, qui in patriam festinasset, si iuvenum curam
excussissem. Varii afferuntur tumultus et ex Germania et ex Helvetiis,
ut certe nullo modo diutius mihi manendum putem. Abest
cum Copus tum Budaeus; Ioannes a Lilio Lucernas, quem tibi
olim effinxi cumque Ammano tibi unice commendaram, nunc in patriam
concessit; oro hominem noscere velis. Porro Ammanum tibi
commendare non est opus, quem et quottidiana consuetudo tibi commendabit
et non mediocris eruditio. Longo tempore nullas accipio
literas, quae res me movit, ut crederem itinera obsepta; ita enim
--169--
citius obrepit suspitio male habentibus, et certe magnam rerum mutationem
futuram auguror, si committentur Franciscus et Carolus.
Invitatus sum ternis nunc literis ab Erasmo, ut ad Levacos concederem,
id est oppidum in Nerviis aut Ambiaritis, ubi nunc ipse
versatur. Verum iuvenes relinquere non audeo. Et certe Parisiis
absque capitis periculo vix habitamus, cuius causam omnem ex Ammano
nostro percipies. Fortassis, si res non componatur, in Iulio
me Tiguri videbis. Minatus sum penori tuo per aliquot dies, si
opus erit, adducturus fortassis et Gryllum aliquem. Cum foenore
tamen tecum habitabo, quantumquantum id fuerit, quamvis prae impotentia
vix mihi, quae scribo, constant. Scripsi item his diebus consilio
Fabri Stapulensis et codicibus aliquot adiutus divorum Felicis
et Regulae historiam, humili stilo, ut a mediocriter doctis intelligi
quiret. Caeterum cavi, ut maxime Christo conformia adiicerem,
resecarem, quae vel inepta vel suspecta. Mirum vero ingenium eius
historiae scriptoribus, quod praeter barbariem, qua negotium maxime
obscurarunt, etiam supra modum ineptierunt. Sed non prodibit in
lucem, nisi tibi placuisse intelligam. Adferet Ammanus exemplar.
Dici non potest, quam desydero res patriae noscere, literas tuas legere.
De reverendissimo domino cardinali audio quam libentissime, eum in
Sedunis receptum pristinaeque dignitati restitutum. Eum virum amo,
cui tu me commendes velim. Mitto tibi de pronuntiatione Graecae
linguae, quod iudicium meum aliquot doctis viris placuit, et quidam
excribere dignati sunt, aut vix a me efflagitarunt. Molior autem
--170--
ea in re nescio quid, ad minimum, quae saecula nostra et literas
Graecas adiuvare queant.
Vale, unicum decus meum, et negotium meum age, ut unice tibi
confido.
Luteciae anno Domini M.D.XIX. ad Idus Maias.
Domino Uldrico Zinglio Doggio, viro et philosopho et theologo,
amico nostro summo. Tiguri in Helvetiis.