779

<< Nr. 778 | Index | Nr. 780 >> 

Absender: Grat, Alexander

Empfänger: Zwingli

Ort: Engen
Datierung: 15 XI 1528

Vorlage: Huldreich Zwinglis sämtliche Werke, vol. 9 (Leipzig: Heinsius, 1925) (Corpus Reformatorum 96), 604-605

--604--

Gratia et pax a domino deo servatore nostro Iesu Christo. Mi
Udalrice
Christum in te regnare, fari, multifarium verbum suum profundere
externus audio, audiamque usque in diem domini magnum; citra assentationem
loquor. At ita me agitat deus. A cunis ad litteras missus,
Wittembergam profectus, cunque ingrueret pestis et grassaretur,
Alpes Suevie superioris, natale solum, repetii. Agentibus fatis
Heydelbergam studium, quod dixere universale, accessi. Ab studio
urgente pauperie discesseram aliquamdiu, aulas vidi et vitam male
Christianam. Iam in decennium ab actis scriba fui Engentini in
Hegaviensi campo. Sub tyrannide vivimus, mi Udalrice. Ex

--605--

familia bonisque meis iam partis octaginta aureos nummos parare
possem, et fortassis latiores, quos ad pedes tuos proiicerem euangelio
favens, si vel minima conditio mihi prestari posset, qua exilissime
viverem cum populo satis Christiano et a te missis erudito. Hec
loquebar Christo fidens.
Vale felicissime in Christo.
Si tuas litteras viderem, deum humanitus viventem tueri me
arbitrarer.
Vale.
Engentini Hegenavie 15. mensis Novembris anno 1528.
Alexander Grat, olim philosophie doctor Heidelberg
cis Necharum, iam ab actis Engentinensibus.
Pellicanus, si vobiscum est, vidit me Heydelberge pedagogum
Friderici de Dalburg, nobilissimi Vangionum antistitis, hominis
trilinguis, qui tum ibi rectorem agebat, patrui et cognati.
Magistro Udalricho Zwinglio, Turecensium vigilantissimo episcopo,
ad candidas manus.