781

<< Nr. 780 | Index | Nr. 782 >> 

Absender: Rechlinger, Ulrich

Empfänger: Zwingli

Ort: Augsburg
Datierung: 2 XII 1528

Vorlage: Huldreich Zwinglis sämtliche Werke, vol. 9 (Leipzig: Heinsius, 1925) (Corpus Reformatorum 96), 608-610

--608--

Genad unnd frid von gott durch Christum etc.
Lieber herr und brueder, es schreibtt euch hiemitt der erwerg, frum.
gottforttig und christlich man Ulrich Rechlinger, burgermaister alhie,
Wollet es alles, so er euch schreibtt, im aller pesten vernemen, wie er es
dan auch guett und treulich maint und sich des gentzlich zu euch versiecht.

--609--

Wen warlich, an heuchlei zu reden, er euch insonderheit liebtt und ain
groß vertrauen in euch hatt, wie ich dan soliches von im offtt verstanden
und erfaren hab. Wolt gott, es mocht darzue kumen, das ir baide
munttlich mittainander reden kundt von vill dingen, davon sich auch nicht
gezimen will zu schreiben. Bitt euch als mein günstig lieben herren, ir
wellet dem frumen mann ettwo offtter schreiben, dan ir bißher gethan
handt; wen ir im kain grosser wollgefallen thuen mogtt, unnd wiert
nicht an frucht abgan; wen soliches vill bey im vermag und nicht ain
klain ansechen haitt, kan auch in vil weg vast woll ensprießen. Der
frum man hatt mier grosse guetthaitt erzaigett und webisen [!], darum ich
gott danck und im pilich das veriechen soll. Gott würckht vill grosser ding
durch disen man, wiewoll er warlich ain grosse purtt auff im tregtt, die
vileicht zu schwer, wo gott nicht zu hilff kem mitt seinen gnaden. Darum
auch trost und vermanung woll von nötten bey disen geschwinden, ge=
ferlichen zeitten. Wollet demnoch, wie ir woll wist zu thuen, geflissen sein
und mier mein ainfeltig schreiben, so ich mitt warhait thue, nicht ver=
argen etc. Ir wert von mayster Michelnn woll wericht empfachen der
predicantten halben alhie. Die 3 luterischen doctores sein im hefftig
aufsetzig, auch dringen si heffttig noch auff Luthers mainung und opinion;
gott well es bessern etc. Brobst von Waldkirchen ist noch nit herkumen,
und, wie die sag alhie, versiecht man sich nicht mer, das er kumen soll
auff den pundtag, wiewoll das geschrai ist, es soll ain reichstag an=
geschlagen werden etc. Die kundtschafftten lautten alhie, wie der Weida
in Ungern widerum in grosser rüstung sey; dergleichen künig Ferdinat [!]
auch mitt sampt andern sich rüsten, im zu weren, und wie man vermaint,
werden si woll all gnueg zu schaffen gwingen [!]. Gott will vileicht also
verhüettenn, damitt ir anschleg kain füergang haben. Euch ist an zweiffel
guett wissen, wie übel die sach in welhischen landen stat etc.

--610--

Ich hoff, ir handt nun woll gesechen, was doctor Eck von Ingelstat
wider die disputation zu Bern hatt im truck außgan lassen; wiewoll es
lugenhafftig und ungeschickht ding ist, noch wolt man gernn, das im soliches,
wie sich gepüert, verantwurtt wüerdt, ob doch ain mall gott genadt geb,
das die füersten von Bairnn die augen auffthuen mochtten, sein plindt=
hait und verfüerung erkanthen.
Es ist die sag, wie doctor Urban well ain buech außgan lassen des
herrnn nachtmal wetreffendt und sich der massen hören lassen, wie forhin
durch in nie weschechen, doch auff Luthers mainung. Wo soliches war
ist und geschiecht, solt ir es paldt empfachen; wellet in alsdan euch lassen
wefolchen sein, wie er woll wirdig.
Wellet von meinen wegen vast grüessen euer frume hausfraw
und ander guett herrnn und fründt.
Damitt sey gott mitt uns allen.
Datum Augspurgk, an Mittwochen 2. Decembris 1528.
Wolf Beckinger, euer williger diener und brueder.
Christiano simul ac docto viro magistro Udalrico Zwinglio,
Tiguri vitam agenti, domino ac amico tamquam fratri suo charissimo,
Tiguri. - Magistro Udalrico Zwinglio dentur.