787

<< Nr. 786 | Index | Nr. 788 >> 

Absender: Mülinen, Hans Albrecht von

Empfänger: Zwingli

Ort: Hitzkirch
Datierung: 21 XII 1528

Vorlage: Huldreich Zwinglis sämtliche Werke, vol. 9 (Leipzig: Heinsius, 1925) (Corpus Reformatorum 96), 622-623

--622--

Gnad und frid von gott dem vatter und unnserm herrn Jhesu
Cristo. Geliepter her und bruoder
Es kumpt zuo mir zeiger dis brieffs, Laurentzius Löw von Bibrach,
mich bittende, üch anzuozeigen, wie er sich by mir gehaltten hab etc. Thuon
üch hiermit zuo vernemenn, das er tützschs ordens gsin ist und also an=
fangs vor jaren vom orden kommen; villicht siner freche oder jungend [!]

--623--

schuld ich zuogeben hab etc. Demnach ist er zuo mir komen; han in also
uffenthalten by einem jar. Ist nit weniger, do er sin selbs empfunden,
ist er widerumb in hohtragens wesen gefallen und sich mit etlichen
minenn diensten zertragen und inn zengk und gehäder gesetzt, unangesechen
was ich von sinthwegen gehandlet, ouch im guotz bewissen hab. Hieruff
in wider von mir gewissenn etc. Ir mögend in aber selbs fragen; er kan
villichter siner handlung üch besser beriht geben, dan ich schribenn kan.
Aber inn disem gib ich im zügnis, das er sich by mir nit anders wüssend
dan fromcklich gehalten, ouch sinen helfferstand woll versechen; ich wil och
achten, er habe sinen verstand gnuogsamlich, und am euuangelion zuo pre=
digen wenig versumen wurde. Ich las ouch zuo, er sye siderhar in armuot
sovil geuebt und wider und für zogen, das er vorab die forcht gottes zuo
handen neme, ouch sin schwinnen in der armuot bedencke, worinn ir im
alsdan helffen wurdend, sich harin schickenn gegen got und der welt, darmit
unnd er villicht verharlichen bliben möchte. Haruff mögend ir nun handlen
noch üwerm guotbeduncken. Ich weis zuo diser zit keinen menschen, by
dem ich ein klein wil als gern als bin üch wäre; ob gott will, wirt
es sich bald schicken.
Die gnad gottes sye mit üch und allen glöbigen, Amen.
Geben inn yll uff Thome im 1528.
Hans Albrecht von Mülinen, comthur zuo Hitzkilch.
Dem wolgelertten meister Uolrichenn Zwingly, byschoff z;ou Zürrich,
minem innsonders geliepten hern und bruoder inn Cristo.