79
Absender: Rhenanus, Beatus
Empfänger: Zwingli
Ort: Basel
Datierung: 24 V 1519
Vorlage: Huldreich Zwinglis sämtliche Werke, vol. 7 (Leipzig: Heinsius, 1911) (Corpus Reformatorum 94), 175-176
--175--
Zinlio suo S. D.
Literę tuae alioqui mihi gratissimę gratiores vel hoc nomine
fuerunt, quod constantiam animi tui in docendo Christo declararint.
Equidem laudandus es, qui rem longe optimam ac saluberrimam prudenter
cęperis; magis laudandus, qui coeptam constanter prosequaris,
ne tantillum quidem mutatus ab his, quibus dolet Christianam renasci
pietatem et puram Christi doctrinam populo tradi. Quod si magnifacit
eos vulgus, qui in acie viriliter perstiterint, an non te virum dicamus,
qui in proposito docendae pietatis tam constanter perseveras?
Sed accipe pulchrum consilium, quod rei, quam nunc agis, valde conferet
et adversariis tuis plurimum nocebit. Adamus Petreius typographus
(nosse te hominem puto) aliquot Lutherii novos libellos
Germanice scriptos typis suis est impressurus, expositionem videlicet
dominicae precacionis luculentam et plane Lutherianam, preterea
"Germanicam Theologiam (ein Teütsche Theologie)", ad quam collata
quamlibet subtilis illa Scoti theologia crassa erit et hebes, et huius
generis alios aliquot libellos. Quos si tu pro concione publice populo
commendaris, hoc est emendos suaseris, crede mihi, negotium, quod
--176--
instituisti, plane ex animi sentencia tibi succedet. Si puerum huc
miseris (nam meretur hęc res hunc sumptum et diligentiam), dabit
Adamus illi quantum voles libellorum. Hoc fiat intra mensem; sed
monebere a nobis. Qui hic prostabant in Misniis excusi, non venditi
sunt, sed ab emptoribus rapti. Horum desyderio et prophani et ecclesiastici
ęque tenentur. Inscripsit tibi Frobenius nostrum in Taciti
"Germaniam" commentariolum. Mitto tibi dono "Positiones Lutherii
contra Eccium" et "Germaniae precacionem". Myconio
gratiam habeo de missis literis. Rescribam, cum erit plus ocii. Haec
me dictante minister excepit.
Bene vale.
Basileę 24. Maii MD.XIX.
Tuus Beatus Rhenanus, Slestadiensis.
De Pomponio Mela Fonteium monebis.
Monebis item alios parochos, ut Lutherii libellos, de quibus
scripsimus, plebi commendare suo tempore meminerint.
Eximio viro Hulderico Zinlio, parocho Tigurino,
[a]mico incompa[r]abili. Turregii.