80
Absender: Froben, Johannes
Empfänger: Zwingli
Ort: (Basel)
Datierung: (ca. 24 V 1519)
Vorlage: Huldreich Zwinglis sämtliche Werke, vol. 7 (Leipzig: Heinsius, 1911) (Corpus Reformatorum 94), 177-178
--177--
Ioannes Frobenius Zinglio suo S. D.
Quum libellum Publii Cornelii Taciti "De moribus et situ Germaniae"
populorum typis nostris excudere coepissemus, commodum ex
amicis nostris quidam commentariolum nobis exhibuit, in quo paucis
aperitur, quorum veterum populorum, qui novi populi sedes hodie
teneant. Equidem mihi sic videtur eos, qui priscae illius antiquitatis
scriptores duntaxat legunt, praeteritis iis, qui mediam antiquitatem
scriptis suis complexi sunt, in multis rebus necessario labi. Nam
quantas tu rerum mutationes a morte Iulii Caesaris factas arbitraris?
Ut concedere cogamur, non tam illius commentariorum, qui certe et
fide et stilo summam laudem merentur, quam Spartiani, Vopisci,
Trebellii Pollionis, Ammiani Marcellini, Eutropii Procopiique
--178--
lectionem esse necessariam. Quod si rediret ex inferis hodie
Caesar, nihil hic propemodum agnosceret. Adeo gens genti mixta
est, populi partim penitus deleti, partim alio translati et, ut summatim
dicam, mutata omnia. Proinde eum commentariolum studiosis usui
futurum tibi volui dicare, qui norim te hoc genus delitiis animum
oblectare solere, quoties ex altioribus studiis obrepsit fastidium. Hanc
eandem rem agunt, ut antiquitati lucem afferant, duo Helvetiorum
decora, Henricus Glareanus, summus amicus noster, et Ioachimus
Vadianus, praecipue in commentariis suis in Pomponium
Melam, quos doctis omnibus probari magnopere gaudeo.
Bene vale.
P. COR= │ NELII TACITI, DE │ moribus & popu= │ lis Germaniæ, │
libellus. │ Cum commentariolo uetera │ Germaniæ populoru uo- │ cabula
paucis explicate (O. O. & I. 4 o), p. 43/44
(nach dem libellus und vor dem commentariolus).