82
Absender: Zwingli
Empfänger: Rhenanus, Beatus
Ort: (Zürich)
Datierung: 7 VI (1519)
Vorlage: Huldreich Zwinglis sämtliche Werke, vol. 7 (Leipzig: Heinsius, 1911) (Corpus Reformatorum 94), 181-182
--181--
Beato Rhenano Zinlius S.
Multa debeo Frobenio non unis nominibus, multa pręterea tibi,
quod nostrorum (mei dico oviumque mearum) tantam curam alis, ut,
si quid orbis novi pariat, ut habeamus, sedulo provideas. Orationis
dominicę enarrationem Lutheri haud vereor nobis displicituram, sed
nec vulgarem "Theologiam", quam in diem absolvi vulgarique promittis;
coememus magnum modum, pręcipue si de adorandis divis
oratione dominica non nihil tractet; nam nos id vetuimus, perque
iuventutem nostram plebs haud immerito solidius firmaretur altero
etiam teste; invocationem sanctorum permisimus magis illis, quam ad
vivum resecuerimus. Porro de libris hoc scias, Ioacimum Vadianum
nos commentariis suis donasse, cum iam olim e Pannonia
domum remigraret; alium velim per Fonteium nobis comparari,
quisquis is tandem est, quem tu modo commendas. - Cępit consilium
prępositus noster promovendi in Gręcis literis cum iuventa Tygurina,
quam Myconius noster hactenus prima rudimenta docuit, quę quidem
nauseam citius generant, si authoris alicuius accessione non condiantur.
Velis igitur (nam apud literarum patronum quid non audeas petere?)
vel aliquem Luciani dialogum per Erasmum versum, nec tamen
interpretatione e regione posita, nam ista pueros ad desidiam detrahit,
prelo subdere, si Frobenio non sit incommodaturum, vel primum
Aristotelis de animalibus librum, quem Gręcę candidatis pręlegeremus.
Commodum autem vidi "Icaromenippum" aliaque Lovanii,
--182--
ut reor, pressa, quę, si nobis contingere possent, nimium quam nobis
satisfacerent; pueri iam animos succinxerunt, quos, te precor, ne frustreris.
Christoforus Clauserus, medicus, a Frobenio petit
opera Copi suo nomine comparari. Operam item eius exuscita; nam
ego cum mearum quoque rerum impendio studiis illorum consulo.
Cętera Fonteio scribimus hac cedula, ne te oneremus. Res nostrę
bene habent, quum ἀντικειμένους ἔχομεν πολλούς, καίπερ ὡς τῷ Παίλῳ
ἡ θίρα ἀνέῳγε | Φράγκος δ̓ ἀνθ̓ ἡμῳν λογομάχεται| τὸ τέλος ἀκούσῃ ποτέ.
Vale et, ut soles, me meaque ęqui bonique consulas.
7. Iunii. Salvi sint Frobenius, omnes. De Tacito intellexi;
scribam quandoque.
Beato Rhenano, vere Christiano viro, amico incomparabili. -
Gen Basel zum Saessel.