84
Absender: Tschudi, Valentin
Empfänger: Zwingli
Ort: Paris
Datierung: 9 VI 1519
Vorlage: Huldreich Zwinglis sämtliche Werke, vol. 7 (Leipzig: Heinsius, 1911) (Corpus Reformatorum 94), 185-186
--185--
Zinglio suo Valentinus Scudus S. D.
Binas post adventum meum Parrhisios ad te dedi literas,
Zinglie doctissime, quibus, quicquid erat, quod tuis auribus dignum
aestimaremus, tibi offudi, adeo ut diu dubitaverim, si in praesentiarum
literas ad te daturus essem, non certe scribendi molestia - quanquam
id mihi gravissimum videatur onus, tum pręcipue, quando cum
eiusmodi viris, ut tu es, tum doctrina tum authoritate admirandis mihi
literis agendum sit - sed quod verebar, ne auribus tuis molestiam
pareret eadem cantilena saepius repetita. At pervicit tandem partim
tua humanitas ad talia connivendi etiam promptissima, partim timor,
ne pigritiae nota perstringerer, quod scribentibus aliis solus ego
cessarim, ut aliquid saltem tumultuarium ad te scriberem. Nam qui
rumores per Franciam ferantur, non dubito, quin alii ad te literis
commiserint. Caeterum Nesenus non ita multo ante apud Erasmum
fuit, qui apologias quasdam illius ad nos pertulit, alteram in
quendam magistrum nostrum Attensem, contra magistrum nostrum
Latomum alteram, quas, nisi ad vos dudum allatas credidissem, ad
te mitterem. Proinde tertiam quoque parare idem rettulit in quendam
--186--
theologum Anglum, illicque eum, quicquid virium sit, effundere.
Sed haec forte tibi non nova recenseo. Si quid sit, quod me quoque
scire refert, rogo literis certum facias.
Vale, et me, ut soles, ama
Ex Lutetia quinto Eidus Iunias M.D.XVIIII.
Ulderico Zinglio viro cum docto tum probo, summo
amico nostro, Tiguri.