86
Absender: Zwingli
Empfänger: Rhenanus, Beatus
Ort: (Zürich)
Datierung: 25 VI 1519
Vorlage: Huldreich Zwinglis sämtliche Werke, vol. 7 (Leipzig: Heinsius, 1911) (Corpus Reformatorum 94), 189-190
--189--
Beato Rhenano Ζΰγγλιος salutem.
Accepi proximis a te diebus scedulam, quam literarum nomine
vix dignaremur, nisi tua fuisset; adeo brevis erat et illarum, quas soles
scribere, rerum inanis, ut coegerit nos eam ęqui boni consulere, quod
nimiis forte fortuna negociis implicitus non potueris amplius. Dolet
nobis ab officina Frobenii te abesse, si modo abes; nam mihi quidem,
dum multa mecum cogitavi, nunquam persuadere potui, ei te
posse renunciare operę, quę tantum glorię non tibi, non universę modo
Germanię, sed Christiano orbi vindicet. Nam, ut novi non nihil
audias, Gulielmus Antonii Puccii a sacris immolationibus a nobis
rogatus, quomodo libri, quos Puccius apud Helvetios comparasset,
in Italiam vecti fuissent, respondit: Commode. Tum ego: Ecquid
Italis hominibus placerent. Ait: Omnes illis supra modum delectari,
laudibus non posse satis vehere; decernere, ut Frobenio solum hoc
munus mandetur, ut eruditorum operas in eum modum ornet. Scivi,
mi carissime Rhenane, dudum rusticius me tuis rebus interstrepere;
at nihil nisi desidiam et negocia excuso, per quę oportuit quandoque
aliis non scribere, tibi vero oportuit; tenes rem, consulas igitur optimi.
En iterum audemus; quid enim apud te audeam? Ioannes Iacobus
Ammanus, adulescens Tygurinus, bono loco natus, Ioannis,
qui apud Basilienses litium scripta facit, ex sorore nepos, olim
Glareani discipulus, nihil Glareanicum referens quam eruditionem,
--190--
homo me Hercules summę spei atque adeo commodus et gratiosus,
ut vultum dignissimum suavitas morum obfuscet, is, inquam, dum
Christianorum imperium operitur, quorsum volvatur, ne temere in
Italiam veniens aut alio rursum migrare cogatur, apud Basileę
doctos merere statuit. Nec aliud abs te cogitare audet flagitandum,
quam, dum Simonem nostrum aut fors tuos exerces, eum quoque
auscultare permittas; facies, mihi crede, rem Christo teque dignam,
ne aliquid tam probę indolis pereat. Capitonem, dixit Liechtenbergius,
habere Luciani exemplar et Aristophanis; quem velim,
cum domum redierit, convenires, ut nobis vendat. Lutheriana dum
absoluta fuerint, quam primum nuncium mittas aut baiulum, qui centurias
aliquot ferat, pecuniam illico recepturus; nos tamen statuimus
peculiarem nuncium cum equo mittere. Tu, quod tibi magis arrideat,
facito.
Vale et rem omnem boni consule.
Anno etc. MCCCCCXIX. VII. Klás. Iulii.
Beato Rhenano, vere Christiano viro, amico incomparabili.