88
Absender: Rhenanus, Beatus
Empfänger: Zwingli
Ort: Basel
Datierung: 2 VII 1519
Vorlage: Huldreich Zwinglis sämtliche Werke, vol. 7 (Leipzig: Heinsius, 1911) (Corpus Reformatorum 94), 193-194
--193--
Beatus Rhenanus Zinglio suo S. D.
Si hic Lucius, qui literas has tibi reddidit, satis prudentiae et
dexteritatis satis habere videbitur, illi velim autor sis, ut Lutherianos
libellos, inprimis "Expositionem dominicae precationis" pro laicis
aeditam, oppidatim, municipatim, vicatim, imo domesticatim per Elvetios
circumferat. Quae res proposito nostro mirum in modum
conducet et simul illum iuvabit. Neque video, cur non maximam tibi
gratiam sit debiturus, si tua potissimum adhortatione fuerit ex errone
factus bibliopola. Porro quanto pluribus notus est, tanto facilius
emptores invenerit. Et quis ei, cui fuerat alioqui nummulum donaturus,
pro tam eximio libro Ursinum dare gravabitur? Sed cavendum
erit, ne quicquam aliorum librorum simul venditandos accipiat, presertim
nunc. Nam plus de Lutherianis vendet emptore quasi coacto,
cum hos solos habebit, a quibus nihil sit, quod illum avocet, ut fit in
magna venalium librorum multitudine. Quod si non putabis satis idoneum
ad hanc rem Lucium, circumspice de alio aliquo, quem deinde
literis tuis amicis ubique commendabis et ecclesiasticis et prophanis.
Interim nacti sumus Germanicam Lutherii "Interpretationem in septem
psalmos quos vocant penitentiales" et sanctam et eruditam. Aristophanem
cum commentariis aestimat Andreas Cratander florenis
--194--
quinque et quarta floreni parte. Si precium arridet, scribe, et
concinnabitur. Hoc ultimo loco tacere non possum, amicum mihi esse
in Suevis, nempe Ravenspurgi, qui, tametsi curiosissimus librorum,
multos iam pridem aeditos Erasmi libellos nondum viderit, et hoc
socordia bibliopolarum. Quin multi libri venderentur, si forent, qui
hos circumferrent et emptoribus insinuarent. Unde dolet mihi studiosorum
infelicitas, quod, cum non desint, qui vilissima quaeque distrahant
ac minima, puta aciculas et hoc genus alia, libraria tamen
negociatio a tam paucis suscipiatur et his plerumque parum ad hanc
rem aptis.
Saluta nomine meo dominum Casparem Frygium et Osualdum
Myconium.
Bene vale.
Basileae festo die τῆς ὑπαντήσεως τῆς Θεοτόκου anno M.D.XIX.
Magistro Huldericho [Zin]glio, pa[rocho Ti]gurino. - Czurich.