93
Absender: Schmid, Jost
Empfänger: Zwingli
Ort: Uri/Altdorf
Datierung: 12 VIII 1519
Vorlage: Huldreich Zwinglis sämtliche Werke, vol. 7 (Leipzig: Heinsius, 1911) (Corpus Reformatorum 94), 203-204
--203--
Min undertänig, bereit guotwillig dienst. Hochgelerter, beruempter,
erwirdiger, wiser herr. Ich danck üch uff dz aller höchst der großen mue
und arbeit und den ernstlichen flis, vor etlichen jaren mit mir in schuolen
zuo Basel gebrucht, mich erbietend, in danckparkeit dz, ob ich kan, umb
üwer wisheit ze beschuldigen.
Witer, lieber, gethrüwer her meister, ich ker zuo dem brunen, da mir
ergetzlicheit entsprungen ist in der hittz miner kintheitt, üch anrueffend umb
hilf und rat etc.
Ich hab einen jungen bruoder von acht jaren. Den hatt mir min lieber,
gethrüwer fatter selig zuo letzen gelassen, nitt gar eins unzimlichen wandels,
genuog suptil des hirns, in gstal [t dz] mich bedunckt, dz, ob man flis an in
wurd legen, etwz studierens halben uß im wurd werden; dz min aller
höchste begird wär, ouch mins gnanten lieben fatters selgen letster will
gesin; daran mich kein kosten wurd beduren. Darum ich von üch, zuo dem
ich mich aller lieb versich, by trager diß briefs antwurt erwart, in guoter
hofnung, ir wert üch hierin demütigen; dan min gentzliche hoffnung und
will wer, in by üwer person ze halten, wo dz nitt ze fil geanmuotet wer.
Wo aber dz nitt sin möcht, dz doch er nach üwerm rat versorgt wurd,
--204--
damitt er zucht und kunst lernen möcht. Hierin wellend üch bewisen, als
ich mich des zuo üch gentzlichen fersich.
Datum uff fritag nach Laurentziy anno domini 1519 zuo Ure.
Üwer williger diener
Iost Schmid, landschriber
zuo Ure.
Dem erwirdigen, hochberuempten und wolgelerten hern und meister
der heilgen gschrift, meister Uolrich Zwingli, lütpriester der hochen stift
zu Zürich, minem insonders gunstigen lieben herren.